Իրանի դեմ պատժամիջոցների վերականգնման փուլային գործընթացը չի նշանակում բանակցությունների դադարեցում. եվրոպական եռյակ
Մեծ Բրիտանիան, Ֆրանսիան և Գերմանիան տեղեկացրել են ՄԱԿ-ին, որ Իրանը խախտում է միջուկային ծրագրի չտարածման մասին 2015 թվականի համաձայնագրով ստանձնած պարտավորությունները: Ուստի այդ երկրները սկսում են Թեհրանի դեմ խիստ պատժամիջոցների վերականգնման գործընթացը։
Այդ պատժամիջոցները կասեցվել էին հենց 2015 թվականի պայմանագրով, սակայն այս տարվա հոկտեմբերի 18-ին այդ մեխանիզմի ժամկետը լրանում է։ Այդպիսով, միջուկային համաձայնագրի ցանկացած անդամ երկիր՝ Մեծ Բրիտանիան, Ֆրանսիան, Գերմանիան, Ռուսաստանը կամ Չինաստանը, կարող են միակողմանիորեն վերականգնել Իրանի դեմ ՄԱԿ-ի պատժամիջոցները: Վաշինգտոնը դուրս է եկել համաձայնագրից 2018 թվականին։ Լոնդոնը, Փարիզը և Բեռլինը ՄԱԿ-ի Անվտանգության խորհրդին ուղղված նամակում մտահոգություն են հայտնել, որ Իրանի միջուկային ծրագիրը «սպառնում է միջազգային անվտանգությանը»։
Սակայն, ըստ եվրոպական կողմի, պատժամիջոցների վերականգնման փուլային գործընթացը չի նշանակում, որ բանակցությունները դադարեցվում են:
Վաշինգտոնը ողջունել է եվրոպական եռյակի նախաձեռնությունը՝ միևնույն ժամանակ պատրաստակամություն հայտնելով գործակցել Իրանի հետ՝ հասնելու միջուկային հարցի խաղաղ կարգավորման:
Իրանի արտաքին գործերի նախարարը անհիմն և անօրինական է որակել եռյակի որոշումը: Աբբաս Արաղչիի խոսքով՝ Թեհրանը միշտ «պատասխանատու և բարեխիղճ մոտեցում է ցուցաբերել միջուկային հարցերը դիվանագիտության միջոցներով լուծելու հարցում»։ Նա շեշտել է՝ համապատասխան արձագանք կտան: Իրանից նաև նախազգուշացնում են, որ եվրոպական կողմի որոշումը հարվածում է Ատոմային էներգիայի միջազգային գործակալության հետ Թեհրանի աշխատանքներին։
