Կիմ Չեն Ընը և Վլադիմիր Պուտինը Պեկինում կմասնակցեն ռազմական շքերթի
26 երկրների առաջնորդներ և կառավարությունների ղեկավարներ կմասնակցեն ճապոնական ագրեսիայի դեմ Չինաստանի ժողովրդի դիմադրության արդյունքում տարած հաղթանակի 80-ամյակի և Երկրորդ համաշխարհային պատերազմի ավարտի տոնակատարություններին, հաղորդում է «Xinhua»-ն։
Հայտարարության մեջ առաջին օտարերկրյա առաջնորդը, որի անունը նշված է, Ռուսաստանի նախագահ Վլադիմիր Պուտինն է, երկրորդը՝ Հյուսիսային Կորեայի առաջնորդ Կիմ Չեն Ընը։
Պեկինում տոնակատարություններին կմասնակցեն նաև Կամբոջայի, Վիետնամի, Լաոսի, Ինդոնեզիայի, Մալայզիայի, Մոնղոլիայի, Պակիստանի, Նեպալի, Մալդիվների, Ղազախստանի, Ուզբեկստանի, Տաջիկստանի, Ղրղզստանի, Թուրքմենստանի, Բելառուսի, Ադրբեջանի, Հայաստանի, Իրանի, Կոնգոյի Հանրապետության, Զիմբաբվեի, Սերբիայի, Սլովակիայի, Կուբայի և Մյանմայի առաջնորդներն ու կառավարությունների ղեկավարները, հաղորդում է գործակալությունը։
Սեպտեմբերի 3-ին Պեկինում կանցկացվի լայնածավալ շքերթ։ Արարողությունը կտևի 70 րոպե, որի ընթացքում Չինաստանի Ժողովրդա-ազատագրական բանակը կներկայացնի զորքերի ավանդական տեսակները և զինված ուժերի նոր ճյուղերը՝ 45 անձնակազմ, առաջադեմ հրթիռային տեխնոլոգիաներ, տանկեր, ինքնաթիռներ և ազգային արտադրության անօդաչու համակարգեր։
